ट्वाकेन्द्र संग गरिएको अमेरिका संवाद ।

नेपाल टेलिभिजनको लोकप्रिय कार्यक्रम तीतो सत्यका दर्शकका लागि ट्वाकेन्द्र पि्रय नाम हो । तितो सत्यको सुरुदेखि नै सो टीममा रहनुभएका कलाकार गोपाल अधिकारी ‘ट्वाकेन्द्र’ अब अमेरिकामै स्थायी बसोबास गर्ने सुरमा हुनुहुन्छ । अमेरिका पलायन हुने कलाकारहरुको सूचीमा उहाँ पनि पर्नुभएको छ । एक वर्ष लामो अमेरिका बसाईपछि उहाँले त्यहाँको ग्रीन कार्ड हात पारिसक्नुभएको छ । अब परिवारसहित उतै बस्ने उहाँको तयारी छ । प्रस्तुत छ तिनै कलाकार अधिकारीसित गरिएको कुराकानी।

० यसअघि अमेरिका के सिलसिलामा जानुभएको थियो ?

- कार्यक्रम प्रस्तुत गर्ने सिलसिलामा म सन् २०१० को जुलाई २६ मा अमेरिका गएको हो । तीतो सत्यका अरु कलाकारसँगै म त्यहाँ पुगेको थिएँ । 

० अमेरिका कतिपटक जानुभयो ?

- अहिलेसम्म एकपटक मात्रै हो गएको ।

० कति बस्नुभयो ?

- १४ महिना बसें ।

० लुकेर बस्नुभएको भन्ने हल्ला चलेको थियो ?

- हल्ला पनि हो । एक हिसाबले भन्दा सत्य पनि हो । ग्रीन कार्ड लिनको लागि धेरै मेहनत गर्नुपर्‍यो । त्यसैले त्यही ढंगले बस्नुपर्‍यो । बाध्यताले पनि अमेरिका बस्नुपर्ने अवस्था आएकाले ग्रीन कार्ड लिएँ । अब चाहिं ढुक्क भएर फर्केको छु ।

० त्यसो भए अमेरिकामै बस्ने ?

- अँ अब के गर्ने त ? घरपरिवार र आफ्नो भविष्य पनि हेर्नुपर्‍यो ।

० यता भविष्य देख्नुभएन ?

- भविष्य नै नदेखेको त होइन, तर आफूले सोचेजस्तो यता होला जस्तो लागेन ।

० कस्तो सोच्नुभएको थियो र भएन ?

- हुन्छ नि आर्थिक पक्ष । यता आफूले भनेजस्तो आर्थिक पक्ष बलियो होला जस्तो लागेन । उता काम गर्न सकिएमा धेरै आम्दानी हुने रहेछ । त्यसैले उतै जान लागें ।

० दाम त होला, तर यहाँ भएजस्तो शान र मान त्यहाँ पाइएला ?

- त्यो त हुँदैन । यहाँ जस्तो नाम र शान छ, अमेरिकामा पक्कै पनि पाईंदैन । नाम र शान नभएपनि दामको लागि जान लागेको हो ।

० अब कहिले जानुहुन्छ अमेरिका ?

- अब जनवरी पहिलो हप्तातिर जाने कार्यक्रम छ । परिवार सहित जान्छु ।

० गएर र्फकनुहुन्छ कि हुँदैन ?

- आउँछु नि बेलाबेला । आफ्नो देशको माया लाग्छ, आउनपर्‍यो नि समय मिलाएर ।

० तपाईंहरूजस्ता कलाकार किन विदेश पलायन हुने क्रम बढेको होला ?

- बाध्यता हो । देशको परिस्थिति यस्तै हो । राजनीतिक स्थिरता पनि हुँदैन । अर्को महत्वपूर्ण कुरा बजार छैन । गुजारा गर्न परिगो । परिवार पाल्न पर्‍यो । त्यसैले बाध्यताबश हामी जस्ता कलाकार पनि विदेश पलायन भएका हौं ।

० अमेरिकामा अरु कलाकार कसरी बसेका रहेछन् ?

- राम्रैसित बसेका छन् । कमाएका छन् । मेहनतका साथ काम गर्नेलाई अमेरिकामा राम्रो छ । आम्दानी प्रशस्त हुन्छ । उनीहरुले बेलाबेला साँस्कृतिक कार्यक्रम पनि प्रस्तुत गर्ने गरेका छन् । साँस्कृतिक कार्यक्रमको दम यहाँजस्तो नभएपनि त्यसलाई उनीहरुले निरन्तरता दिएकै छन् ।

० अरु नेपालीको अवस्था चाहिं कस्तो पाउनुभयो ?

- सबै राम्रैसित बस्नुभएको छ । यहाँ साइकल चढ्न समेत नपाएकाहरुले उता कार चढ्नुहुन्छ । कमाई राम्रै छ ।

० नेपाल र अमेरिकाबीच के फरक रहेछ ?

- अमेरिकासित नेपाललाई दाँज्नै सकिन्न । विकास निर्माणमा नेपाल अमेरिकाभन्दा ३ सय वर्ष पछाडि छ । हर कुरा राम्रा छन् त्यहाँ । सिस्टम छ । अनुशासन छ । काम गर्नेको इज्जत छ । जुन यहाँ पाईंदैन । त्यहाँ काम गरे अनुसार, मेहनत गरे अनुसार कमाउन सकिन्छ । आम्दानी राम्रो छ । त्यहाँ कुनै भेदभाव हुँदैन । साना ठूला सबैलाई बराबरी कानुन लाग्छ । राष्ट्रपतिको छोराले कानुन उल्लंघन गर्दा उसले समेत मुक्ति पाउँदैन । अमेरिकामा काम गर्नुपर्छ । तर यहाँ काम नगरेपनि बाँच्न सकिन्छ ।

० त्यहाँ र यहाँको राम्रो र नराम्रो पक्ष के रहेछ ?

- अमेरिकामा सबैभन्दा राम्रो कुरा सिस्टम हो । जुन नेपालमा छैन । अर्को अमेरिकामा भन्दा नेपालमा प्राकृतिक वातावरण राम्रो छ । भौगोलिक अवस्था सुन्दर छ । जुन अमेरिकामा छैन ।

० अमेरिकाको के कुराले तपाईंलाई प्रभावित बनायो ?

- मलाई त्यहाँको सिस्टमले नै प्रभावित पार्‍यो । सिस्टमले त्यहाँ मान्छेलाई बाँधेर राखेको छ । बाँधेर भनेको पशुलाई बाँधेजस्तो, कैदीलाई थुनेजस्तो होइन । अनुशासित वातावरण । जसले कसैलाई पनि भेदभाव गरेको छैन । मलाई यही कुराले नै बढी छोयो ।

० अमेरिकामा हुँदै कुनै अविस्मरणीय घटना भोग्नुभयो ?

- भोगें । एउटा साँस्कृति कार्यक्रममा दिपकराज गिरी, दीपा श्री निरौला र म मिलेर एउटा प्रहसन देखाउँदैथियौं । मैले भारतीय प्रहरीको भूमिकामा अभिनय गर्नुपर्ने थियो । भारतले नेपालको सीमा मिच्दैछ भन्ने सन्देशमुलक प्रहसनमा मैले भारतीय प्रहरीको भूमिका निभाएर सीमा अतिक्रमण गरेको देखाएँ । भारतीय प्रहरीले नेपालको सिमाना मिचेको कुरा एकजना दर्शकलाई साह्रै सही नसक्नु बनाएछ । मलाई साँच्चैको भारतीय प्रहरी भनेर उहाँले जुत्ताले हिर्काउनुभयो । पाखुरामा नराम्रोसित जुत्ताले लाग्यो । त्यो जुत्ताले पाखुरामा बनाएको नीलो दाग एक हप्तासम्म हराएन । साह्रै दुख्यो ।

० के भएमा अमेरिकामा रहेका नेपालीलाई स्वदेशमा फर्काउन सकिएला ?

- राजनीति स्थिरता र विकास नै ठूलो कुरा हो । राजनीतिक वातावरण राम्रो भयो भने कोही पनि अमेरिका लगायत विदेशमा काम गर्न जाँदैनन् । काम गर्ने वातावरण हुनुपर्‍यो । कामको कदर हुनुपर्‍यो । त्यस अनुसार सेवा सुविधा र पारिश्रमिक हुनुपर्‍यो । उद्योगधन्दा फस्टाउने वातावरण बन्नपर्‍यो । नेपाली नेताहरु बिदेश गैरहनुहुन्छ । अमेरिकामा पनि जानुहुन्छ । अरु केही नभएपनि त्यहाँको विकास निर्माणबाट प्रभावित भएर नेपालमा पनि त्यसकै अनुसरण गर्न सके धेरै विकास हुन्छ । त्यहाँको जस्तो सिस्टम अनुसरण गर्न नसकेपनि १० प्रतिशत मात्रै यहाँ ल्याउने हो भनेर धेरै राम्रो हुन्छ । यसो हुन सकेमा कोही पनि अमेरिका बस्दैन । आˆदै देश र्फकन्छन् । जान खोज्नेहरु पनि रोकिन्छन् ।