सात फिट लामो टुप्पी

 सुन्दै अचम्म लाग्ने । सात फिट लामो टुप्पी हुन्छ भनेर । तर  पर्वत बिरुवाबारी १ का ८० वर्षीय टंकनाथ न्यौपानेको टुप्पी भने सात फिट लामो छ । २५ वर्षको उमेरदेखि पाल्न सुरु गरेको टुप्पी ५५ वर्ष बुढो भइसकेको छ ।

वृद्ध अवस्था पारसँगै आँखाको ज्योति गुमाएका उनी हातले छामेर टुप्पीको स्याहारसुसार गर्छन । शिवजीका भक्त न्यौपानेले टुप्पी लामो भएकाले जनैले बाँधेर हिँड्ने गरेका छन् । त्यसो त उनले दशकौंदेखि टुप्पी पालेको खबर सुनी हेर्न र टुप्पीको फोटो खिच्न घरमा आगन्तुकहरू आइरहने बताए ।

'मैले नत नेताको बानी सुध्रियोस्, न समयमै संविधान बनोस् भनेर टुप्पी पालेको हो,' उनले भने, 'आफू ब्राह्मण समुदायको भएकाले अस्तित्व जोगाउनकै लागि पालेको हुँ । उनका अनुसार आफूलाई ब्राह्मण भन्नेमध्ये केहीले टुप्पी पाल्ने गरे पनि अधिकांशले छाडिसकेका छन् ।

न्यौपानेका श्रीमती र ३/३ जना छोराछोरी छन् । 'सुरुमा त कपालसहित टुप्पी पालेको थिएँ,' उनले भने, 'कपाल सबै झर्दै गयो, अन्तिममा टुप्पी मात्र बाँकी रह्यो ।' उनले सबै समुदायको आ-आफ्नो जातीय परिचय दिने माध्यम भएको र आफूले पालेको टुप्पीले ब्राह्मणको परिचय दिएको बताए । उनी वर्ष दिनमा एक पटकमात्र टुप्पी फुकाएर नुहाउने गर्छन् । अन्य समयमा दैनिक नुहाए पनि टुप्पीलाई सामान्य रूपमा पखाल्छन् ।

'टुप्पी सानो भए पो दिनहुँ धुनु,' उनले भने, 'लामो भएकाले प्रत्येक शिवरात्रिका दिन राम्रोसँग सफा गर्दै आएको छु ।' उनले टुप्पी लामो भएकाले नातिको सहयोगमा सफा गर्ने गरेको बताए । टुप्पी देख्नेहरू आश्चर्य मान्दछन् । 'यति लामो टुप्पी त मैले अहिलेसम्म देखेको थिइनँ,' कार्यक्रमको सिलसिलामा रानीपानी पुगेका अपांग उत्थान समाज अध्यक्ष गणेश शर्माले भने, 'आज प्रत्यक्ष रूपमा यति लामो टुप्पी देख्न पाएँ, जसले मलाई अचम्मित बनायो ।'

टुप्पी लामो भए पनि न्यौपाने कहिल्यै कोर्दैनन् । 'सुरुमा त परिवारले किन यति लामो टुप्पी पालेको भनेर कराउने गर्थे,' उनले भने, 'हाम्रो परिचय यसैमा छ किन काट्नु पर्‍यो भन्दै सधैं एउटै जवाफ दिँदै आए, हिजोआज त कराउन छाडे ।' भेट हुने सबैजसोले पाल्नुको कारण सोध्ने गर्छन् ।

'पहिला त हजुरबाको टुप्पी देख्दा डर लाग्ने गथ्र्यो,' नाति सुजनले भने 'अहिले त यसलाई बाँध्ने फुकाउने मैले नै गरिदिन्छु ।' उनले हजुरबाले आँखा नदेख्ने भएकाले टुप्पी र हजुरबाको रेखदेख गर्ने गरेको बताए ।
(source: ekantipur)